यौवन मारेला किलकारी - अनिरुद्ध कुमाऱ

सुरभित तन-मन मटकी मारे, रास रंग लागे गुनकारी।
पुरुआ रह-रह के झकझोरे, यौवन मारेला किलकारी।।
             सतरंगी हर कोना कोना, 
              ऋतुराजा के बा तइयारी।
              हरियाली अंजुरी पसरले,
              मनहर लागेला दिलदारी।
फूल मंजरी टहनी ड़ाढ़ी, सुंदर लागत बा फुलवारी।
पुरुआ रह-रह के झकझोरे, यौवन मारेला किलकारी।।
             गाँव गली नर हो या नारी,
             प्रेम तान धुनपे सुधि हारी।
             मनभावन परिधान पहिरके, 
             स्वागत में गजबे फनकारी।
बासंती  मनहर मनमोहक, रंग निखारल बा मनुहारी।
पुरुआ रह-रह के झकझोरे, यौवन मारेला किलकारी।।
              लहरा   लहरे   बूटी  धानी, 
              फहर सोहर करे मनमानी।
              लहराये चित ले हिचकोला, 
              बउराइल  मनप्रीत  तुफानी।
यौवन झूमें ताल मिलावे, हाँथे हाँथ रंग फिचकारी।
पुरुआ रह-रह के झकझोरे, यौवन मारेला किलकारी।।।               
               पगड़ी, चुनरी नाचे गाये, 
               खेल रहल बा सुंदर पारी।
               भंग रंग सबके थिरकावे, 
                ई का जाने  नर आ नारी।
लाल पीयर रंग रंगाइल, पहुना लागस सबपे भारी।।
पुरुआ रह-रह के झकझोरे, यौवन मारेला किलकारी।।
                 एने ओने जेने तेने, 
                 सगरो चढ़ल बावे खुमारी।
                 राधा बनठन गोरी नाचे,
                 सखा सजल बाड़े बनवारी
ढ़ोलक झाल मजीरा बोले, सबके जीवन हो सुखकारी।
पुरुआ रह-रह के झकझोरे, यौवन मारेला किलकारी।।
- अनिरुद्ध कुमार सिंह, धनबाद, झारखंड