भोजपुरी देवी पचरा युगल गीत – श्याम कुंवर भारती

नायिका –
सिहरत लागे मोर बदनवा हो सइयां मईया पूजनवा।
हहरत धावे गरजत शेरवा हो सइयां मईया पहड़वा।

केथुआ के बनल मईया रउरे गार हरवा,
कैथुआ के चढ़ेला ओहार हो सइयां मईया पूजनवा।
नायक-
लाल अड़हुलवा के बनल गोरिया मईया के हरवा,
ललकी चुनरिया चढ़ेला ओहार हो गोरिया मईया पूजनवा।
सिहरत लागे मोर बदनवा……..।
नायिका-
केतना किस्म के बनेला सइयां मईया के अहरवा ।
कैथुआ धोवाला चरण जलधार हो सइयां मईया के चरनवा।
नायक-
सोरहों प्रकार चढ़ेला गोरिया मईया के अहरवा,
अँसुवा धोवाला चरण जलधार हो गोरिया मईया के चरणवा।
सिहरत लागे मोर बदनवा……।
नायिका-
कईसे के रिझाई सइयां मइया के मनवा,
कईसे के पाई दुलार हो सइयां मईया वरदनवा।
नायक –
भऊआ के भूखल गोरिया हमरो देवी मईया,
तन मन होजा न्योछार हो गोरिया मइया मिली वरदनवा।
नायिका –
सिहरत लागे मोर बदनवा हो सइयां मईया पूजनवा
– श्याम कुंवर भारती (राजभर), बोकारो,
झारखण्ड , मॉब.9955509286